Ria.Az | Reporter İnformation Agency: 09/11/09 AAK və ATDT koordinasiya şurasının birgə toplantısı keçiriləcək

09/11/09 AAK və ATDT koordinasiya şurasının birgə toplantısı
keçiriləcək
================================================================================
Baş Redaktor on 09/11/2009
 
Diasporla İş üzrə Dövlət Komitəsi Avropa Azərbaycanlıları Konqresinin
və Avropanın müxtəlif ölkələrindəki türk icmalarının Dövlət
Komitəsinə ünvanladığı müraciətləri nəzərə alaraq belə bir
tədbirin keçirilməsi təşəbbüsü ilə çıxış edib. DİDK-yə daxil olan
müraciətlərdə bildirilir ki, 2009-cu il ərzində regionda baş verən bir
sıra mühüm hadisələr, xüsusilə də oktyabrın 10-da Türkiyə və
Ermənistan arasında «Diplomatik münasibətlərin qurulmasına dair» və
«İkitərəfli əlaqələrin inkişaf etdirilməsinə dair» protokolların
imzalanması Azərbaycan və Türk diaspor təşkilatlarının ciddi
narahatlığına, etirazına səbəb olub. Diaspor təşkilatları birmənalı
Ermənistan-Azərbaycan, Dağlıq Qarabağ münaqişəsi həll edilmədən
Türkiyə-Ermənistan sərhədlərinin açılmasının yolverilməz oldugunu və
bu məsələdə Azərbaycan Respublikasının mövqeyini dəstəklədiklərini
bildirirlər.
Regionda baş verənlərə dair Azərbaycan və Türk diasporlarının
mövqeyinin daha geniş miqyasda ifadə olunmasını zəruri sayan Diasporla
İş üzrə Dövlət Komitəsinin dəstəyi ilə keçiriləcək ikigünlük
toplantıda Avropa Azərbaycanlıları Konqresi və Azərbaycan–Türk Diaspor
Təşkilatları Koordinasiya Şurasının üzvləri ilə yanaşı Azərbaycanın
dövlət rəsmiləri və millət vəkillərinin iştirakı nəzərdə tutulub.
Avropa Azərbaycanlıları Konqresi və Azərbaycan–Türk Diaspor
Təşkilatları Koordinasiya Şurasının iclası üç paneldən ibarət olacaq.
Birinci panel “AZƏRBAYCAN-TÜRKİYƏ: ORTAQ TARİX, ORTAQ MARAQLAR VƏ ORTAQ
PROBLEMLƏR” adlanacaq. Bu hissədə «Azərbaycan-Türkiyə strateji
tərəfdaşlığı regionda sülhün, sabitliyin və inkişafın əsas amili
kimi», «Türkiyənin Cənubi Qafqaz siyasətində Azərbaycanın yeri»,
«Ermənistan-Azərbaycan, Dağlıq Qarabağ münaqişəsinin ədalətli həlli
Azərbaycan və Türkiyənin xarici siyasətində prioritet vəzifə kimi»,
«Erməni soyqırımı» iddiaları bütün Türk dünyasının ümumi
mənafelərinə qarşı yönəlmiş məqsədyönlü təxribat və siyasi
riyakarlıq nümunəsi mövzuları ətrafında çıxışlar səslənəcək.
İkinci panel isə “AZƏRBAYCAN VƏ TÜRKİYƏNİN  QLOBALLAŞAN DÜNYAYA
İNTEQRASİYASI: REALLIQLAR, PROBLEMLƏR VƏ PERSPEKTİVLƏR” mövzusunda
olacaq. Toplantının bu bölməsində «Azərbaycan və Türkiyə regionda
həyata keçirilən qlobal iqtisadi layihələrin mərkəzində», «Türkdilli
Dövlətlərin Parlamentləlrarası Assambleyası türkdilli ölkələr
arasında əməkdaşlığın inkişafında mühüm amil kimi», «Türkiyənin
Yaxın Şərq (Orta Doğu) siyasətinin regionda sülhün və əmin-amanlığın
yaradılması üçün vəd etdiyi perpektivlər», «Türkiyənin Avropa
Birliyinə üzvlüyü sahəsində mövcud problemlər və onların həllində
Azərbaycanın rolu» mövzuları ətrafında fikir mübadiləsi aparılacaq.
“AZƏRBAYCAN VƏ TÜRK DİASPOR TƏŞKİLATLARI ARASINDA ƏMƏKDAŞLIQ
MÜASİR İNKİŞAF SƏVİYYƏSİ VƏ PERSPEKTİVLƏRİ” adlı üçüncü
paneldə isə «Azərbaycan və Türk diaspor təşkilatlarının birgə
fəaliyyət strategiyası və onun həyata keçirilməsi istiqamətində
qarşıda duran vəzifələr», «Azərbaycan və Türkiyə arasında iqtisadi,
siyasi və mədəni əlaqələrin inkişafında diasporların rolu» və
«Xarici ölkələrdə yaşayan azərbaycanlıların və türklərin
ictimai-siyasi fəallığının artırılması sahəsində mövcud olan
problemlər və onların həlli yolları» ətrafında danışılacaq.
Müzakirələrin sonunda müvafiq sənədlər qəbul olunacaq.
Qeyd edək ki, toplantı çərçivəsində “Avropa Azərbaycan İnformasiya
Mərkəzi”nin təqdimat mərasimi də keçiriləcək. Bu mərkəzin
yaradılması barədə ideyanı və layihəni Benilüks Azərbaycanlıları
Konqresi irəli sürüb. Belə bir mərkəzin yaradılması Avropadakı
Azərbaycan diasporunun təbliğat imkanlarını genişləndirəcək. Mərkəz
ölkəmizin tarixi və bu günkü reallıqları haqqında əsasən avropalılara
informasiya ötürməklə məşğul olacaq. AAİ-nin yaradılması
nəticəsində xaricdə yaşayan soydaşlarımız arasında həmrəyliyin daha
da möhkəmlənməsi ilə yanaşı, onlarla Azərbaycan ictimaiyyəti arasında
da mühüm körpu yaranacaq. Layihə həm də dilindən, mənəvi
dəyərlərindən uzaq düşərək Avropa cəmiyyətində assimliyasiyaya
uğramaqda olan bir sıra gənc soydaşlarımızın milli mənəvi
dəyərlərimizə, mənsub olduqları xalqın tarixinə, mədəniyyətinə
marağını artırmağı qarşısına məqsəd qoyub.
Avropa Azərbaycanlıları Konqresi və Azərbaycan–Türk Diaspor
Təşkilatları Koordinasiya Şurasının birgə toplantısı çətçivəsində
həmçinin Avropa Azərbaycan Qadın Təşkilatları Birliyinin Təşəbbüs
Qrupu yaradılacaq. Avropa ölkələrində yaşayan azərbaycanlı xanımlar
Azərbaycan mədəniyyətini, ədəbiyyatını, incəsənətini, milli
adət-ənənələrini təbliğ etmək üçün bir araya gələrək belə bir
qurum yaratmaq təklifi ilə çıxış ediblər. Bu təşkilatı yaratmaqla
xanım həmvətənlərimiz Avropa məkanında Azərbaycanın mənafelərini
qorumaq və ölkəmizin imicini daha da yüksək səviyyələrə qaldırmaq
istiqamətində görülən işlərə öz töhfəsini vermək istəyir.
Ria.Az